HKI Desa Gajah// BAHAN SERMON HKI DAERAH XI SUMATERA TIMUR III Minggu I Dung Trinitatis, 23 Juni 2019

BAHAN SERMON HKI DAERAH XI SUMATERA TIMUR III

Minggu I Dung Trinitatis, 23 Juni 2019

Evanggelium: Pangungkapon 22 : 12 – 17                         Epistel: 2 Musa 15:12-18

I.                   Patujolo

Buku pangungkapon, ima sada buku na disurathon si Johanes na dipasahat uju na dibolongkon ibana tu Pulau Patmos. Di tikki masa pemerintahan Kaisar Nero sian Romawi dohot Dominiatus, mansai godang do parungkilon na niadopan halak Kristen, godang do halak Kristen na mate martir alani haporseaonna na mangihuthon Jesus. Si Johanes sandiri dohot do mangadopi pangaleleon na jorbut i, pola ingkon tarbuang do ibana tu pulau Patmos. buku pangkaphon na disurathon si Johanes dipasahat ibana do tu pitu huria na adong di Asia, Asia na ni maksud ima daerah manang wilayah kekuasaan Romawi (nuaeng on ima daerah Turki - sekitarna). Pitu huria na dipasahat ima huria Efesus, Smirna, Pergamus, Tiatira, Sardes, Piladelphia dohot Laodikea. Ia sangkap ni buku on na niungkaphon Debata tu si Johanes ima laho mangalehon motivasi manang semangat tu ruas ni huria i asa margogo jala togu haporseaon nasida nangpe mangadopi akka parungkilon na bolon i. Parungkilon naung ro dohot na naeng masa dope, suang songoni haujungan ni angka na masa i.

Jadi, buku on marisihon tudutudu taringot tu angka na naeng masa sogot dohot tumpal ni angka na badia di harajaon ni Debata, andorang so sahat tu hasonangan sogot, marsitaonan do huria i mangadopi huaso ni portibi on, alai na ro ma Kristus i, manaluhon saluhutna angka huaso harajaan ni portibi on, mandabu uhum tu angka pardosa jala pasahat tumpal tu angka na badia. Alani i mansai gomos diondolhon pangungkapon on, asa satia ro di ujungna, ai na satia ro di ujungna, i do na manganhon parbue ni hau hangoluan.

II.                Hatorangan

Alpa dohot omega, ima istilah  jotjot na tabege taringot tu haroroni jesus manang taringot tu huasona, Alpa dohot Omega do huruf na parjolo dohot parpudi di bahasa Yunani do na dipangke tingki manurathon padan na imbaru, termasuk ma disi buku pangungkapon on, jadi Alpa dohot Omega tudos do i manggombarhon holan Jesus do na didok mulana dohot ujungna, Ibana do Debata pargogo na so hatudosan, jala tongtong do Ibana songon i. Diturpuk on didok Jesus do “Ahu do mulana jala punsuna, parjolo jala parpudi, bonana dohot ujungna”. Dipataridahon do hadirionna di tongatonga ni huria i, asa unang ganggu roha nasida paboa di angka na manahan adong sihirimon ima hangoluan i.

Ditaringoti do haroroni Kristus na paduahalihon dison, barita on songon  apul-apul dohot las ni roha tu angka na porsea dibagasan goar ni Kristus, jala uhum na bolon tu angka na so porsea i. Didok do Ibana bonana dohot ujungna, on ma na patandahon diriNa na manontong i, ndang songon na adong di portibi on holan parsatongkinon do saluhutna. “Ahu do Bonana jala Ujungna”, ninna Tuhan Debata, Debata nuaeng, Debata naung adong hian, na naeng ro i, Sigomgom saluhutna, na marlapatan holan Ibana do na marhak laho patontuhon langka dohot ngolu ni saluhut na adong di portibi on, ala Ibana do na manompa dibahen i, Ibana do na patut pasaehon/mangujungi hombar tu lomo ni rohaNa.

Ditingki on, tontu godang angka na hansit na ingkon sibolusonta na mungkin olo mambaen hita tunduk manang mambaen hita marsak jala manaon. Alai ala adong do tujuan sihirimonta ima ngolu na sonang jala naingkon rap hita dohot Debata, ingkon ma hita manahan jala gomos marsigantung tu Debata, taulahon ma ulaon na hombar tu lomo ni roha ni Debata, ndang marisuang hasatiaon ni angka na posea jala na satia. Asa unang ganggu hita diparungkilon na borat i, ringkot situtuma habengeton asa manghirim tu haluaon na sian Tuhan i. Ala parungkilon dang adong na boi pasidinghon i, alai siadopan do i, molo mardalan rap Jesus dapot hamonangan do hita laho mandalani angka parungkilon. Naeng ma sian haporseaon hita marposniroha di na so adong biar ni roha mamereng na masa on, ai mansohot do gogo nasida jala suda do ariarina, parsatongkinan do hasianganon, molo porsea hita di hata ni Debata, sai na lehononna do gogo di hita asa hot marhasatiaon jala marbenget ni roha sahat tu haroroni Tuhan Jesus Kristus paduahalihon ima manguhumi di angka na mangolu dohot na mate, na jahat dohot na sintong. Nunga sian mulana Ibana adong, jala Ibana do na jumadihon saluhutna umbahen na manjadi (bnd. Joh.1:1-4). Ibana do mangarade nang kebutuhan ni ganup asa denggan mangolu. Dibahen i holan Ibana do sisombaon jala sihaposanta. Tapataridahon ma i marhite gulmit ni ngoluna be. Amen ?

D. Sihombing, S.Th